Brauhausgulasch medd Spätzle unn Mausohrsalat

deftichie Hausmannskoscht a la bonheur…….

Dodezu brauche mir: (fa etwa 6 gudde Portione)

1 Kilo Gulasch vunn de Wutz
2 Schtigg Zwiwwele, gewerfelt
2 Zeebcher Knowweloch, gedriggt
300 Gramm Suppegemies (Laach, Gellerrieb, Sellerie, Peterling), kleen geschnied
1 Eßleffel Senneft, mittelscharf
2 Eßleffel Tomaademark
100 Millilidder Sahne odder e halwer Becher Krääm fresch
1 Flasch guddes Bier (e halwer Lidder), kenn stark gehopptes Bier nemme, also kenn Urpils odder Jever!!! (Sunscht werd das bitter wie Gall!) Am Beschte e gudd Malzisches, Dunkles, Bock odder Weize geht aa.
1 Eßleffel Zucker
1 Eßleffel Gemiesebrieh (Instant)
1 Dippche Bouillon pur Rind vunn Knorr odder e Buillon-Werfelche o.ä.
Schmalz odder Öl zum Broode
hundsgeweenliches Kraanewasser, Salz, Peffer, Paprigaapulver, Soßebinder

1 Kilo Spätzle aus de Tuut

fa es Salätche:

300 Gramm Mausöhrche (Feldsalat)
1 Zeebche Knowweloch, gedriggt
1 Teeleffel sießer Senneft
1 Teeleffel mittelscharfer Senneft
75 Millilidder Melfor Essich
1 Maul voll Kraanewasser
2 Eßleffel Rapsöl (odder anneres)
1 gestrichner Teeleffel Salz
1 gestrichner Teeleffel Zucker
Peffer, Paprigaapulver, Maggi

So mache mir’s:

Es Gulasch in eme große Topp mim Schmalz (odder Öl) unn em Zucker gudd anbroode. De Flääschsaft gudd inkoche losse. Es Tomaademark, de Knowweloch unn die Zwiwwele medd anröschte. Dann die Flasch Bier eninnschitte, es Gemies unn de Senneft dezu, es Bouillon eninn unn e guddie Stunn, bei reduzierter Hitz, medd Deckel uffem Topp scheen inkoche losse. Zwischedrin mol Wasser nooschitte.
Je länger es kocht, desto besser werd’s, das heeßt, es kann a geere noch e halb Stunn länger bruddelle!
Wanns Flääsch scheen zart is unn fascht zerfallt, die Sahne odder die Krääm Fresch eninnriehre, kräftich Paprigaapulver eninn unn met em Salz, Peffer unn de Gemiesebrieh abschmecke. Medd Soßebinder andicke, je noo Geschmack.
Die Spätzle noo Packungsanleitung zubereite.
De gebutzte Feldsalat gudd abtropse losse. In de Salatschissel die Zutate fa es Dressing, außer em Öl, metnanner verriehre, erscht zuletscht es Öl ninn riehre unn de Salat scheen dorchenanner mache. Abschmacke unn serwiere.
Anstatt Spätzle schmacke aa Knepp o.ä. zum Gulasch.

De Kichebulle winscht e Gurrer!

Hoorische Knepp medd Speckrahmsooß unn Kraut

e saarlännisches Nationalgericht, eenfach unn gudd, so simpel, das kann jeder noomache

Dodezu brauche mir: (fa etwa 8 fauschtgroße Knepp, ausreichend fa 4-5 Persone)

2 Kilo Grumbiere
1 Päckche Knödeldääg halb unn halb (Knödelteig, trocken, etwa 300 gr.),
erspart denne Andeel an gekochte Grumbiere unn die geriewene misse nedd im Gescherrduuch ausgedriggt werre, de Unnerschied schmeckt sowieso kenner, nur die Foozer 🙂
1 Teeleffel Salz
1 Pries Peffer

fa die Sooß:

150-200 Gramm gewerfelter Schinke odder Därrflääsch
1/2 Lidder Sahne
1 Teeleffel e gehäufter, Gemiesebriehpulver, Instant
2 Eßleffel Öl zum Broode

So mache mir’s:

Zwee große Töpp uffstelle unn leicht gesalznes Kochwasser zum Bruddelle bringe. Die geschälte Grumbiere in e Schissel reiwe, am Beschte nadierlich in de Kichemaschin. In de Schissel dann etwa 3/4 vun de Grumbier-Brieh wegschitte, es Knödelpulver eninn mache, Salz unn Peffer unn alles scheen zu eme nedd zu trockne Dääg knete. Wann er zu trucke is, eenfach e Grumbier meh eninnreiwe. De ferdiche Dääg nedd zu lang stehn losse, sunscht zieht er widder Wasser. Scheene, fauschtgroße Knepp forme unn mem Seihleffel vorsichtich ins leicht kochend Wasser losse, es sollt nedd zu stark koche, evtl. die Hitz reguliere. Die Knepp brauche, je noo Größe nadierlich, so etwa 20-30 Minudde. In eme Topp nedd meh wie vier bis fünnef Knepp eninn duun, so dass se scheen frei schwimme kenne.
Derweil es Kraut uffstelle. Fa die Sooß es Därrflääsch im Öl in eme Dippche anbroode, medd de Sahne ablösche, es Gemiesebriehpulver eninn unn kurz eemol schaumich uffkoche losse (Vorsicht, dass es nedd iwwerkocht, sunscht gebbt’s Saurei unn stinkt), dann erunner vunn de Hitz unn warm halle.
Wann die Zeit fa die Knepp erum is, mol enner aus em Wasser fische unn uffschneide, sollt er in de Mitt noch e bißje roh sinn, noch finnef Minudde dranhänge.

Uffem Deller e Knopp gehälft, medd Sooß iwwergieße unn medd ner Schipp Kraut serwiere.

De Kichebulle winscht e Gurrer!

Gefillde Paprigaaschoote, griechisch Art…

in Tomaadesooß medd Basmatireis
(nedd steuerfrei, awwer dodefoor aa nedd E.U. gefördert!)

Dodezu brauche mir: (fa 4-5 Persone)

1 Kilo Rinderhack
5-7 Schtigg Paprigaaschoote, scheene große, gebutzt unn de Deckel abgeschnied, die Deckele mische mir ganz kleen geschnied unner’s Hack unn in die Sooß
200 Gramm Fetakääs odder wer’s noch griechischer maan, richticher Schoofskääs, in Werfelcher
100 Gramm geriewener Kääs
3 Eßleffel schwarze Oliwe, fein geschnied (wer’s nedd maan, weglosse)
1 Päckche passierte Tomaade
2 Schtigg Zwiwwelle, in feine Werfelcher
2-3 Zeewe Knowweloch, gepreßt odder fein geschnied
2 Eßleffel Tomaademark
100 Millilidder Sahne
1 Eßleffel Zucker
1 Humpetass Basmatireis (sinn so etwa 250-300 Gramm)
2 Eßleffel Oliweöl
Salz, Peffer, Gemiesebrieh Instant, evtl. Gyros-Gewerzmischung, hundsgeweenliches Kraanewasser

So mache mir’s:

Es Hack in erer Schissel medd de Hälft kleengeschniedene Paprigaadeckelscher unn em dreivertelse Feta/Schoofskääs, de Hälft Zwiwwelwerfelcher, de Oliwe, enner gepreßt Knowwelochzeeb, eme gestrichne Eßleffel Salz unn ner gudd Pries Peffer orndelich dorchknete. Anstatt em Salz/Peffer kamma aa e Gyros-Gewerzmischung nemme. Die Masse dann in die Schoote gudd eninndrigge. In ner Ufflaafform dann bei 200 Grad in de vorgeheizte Backowe stelle (etwa 15-20 Minudde). Sollt vun dere Hackflääsch-Masse ebbes iwwerich bleiwe, eenfach noher medd in die Sooß dezu duun. Es Wasser fa de Reis uffstelle. Derweil in eme Topp im Oliweöl de Rescht vunn de Zwiwwelwerfele unn em Knowweloch, medd eme Eßleffel Zucker anschwitze, Tomaademark medd anreeschte, die passierte Tomaade ninnriehre unn medd em reschtliche Fetakääs, de reschtliche Paprigaaschtickcher unn e bißje Kraanewasser uffkoche. Wer’s maan, kann dort aa noch e paar Olive eninnschnibbele. Die Sahne dezu riehre. Medd Salz unn Peffer abschmecke. Evtl. noch e Teeleffel Gemiesebriehpulver eninnriehre. Die Ufflaafform aus em Owe eraus hole (Vorsicht heiß!), de Owe uff 160 Grad erunner stelle, die Tomaadesooß in die Ufflaafform fille, scheen um die Schoote erum verdeele, e Leffel Sooß iwwer jedie Schoot unn noch e bißje geriewener Kääs driwwer, de rescht Kääs in die Sooß. Die Form nochmol, bis de Reis gudd is, in de Owe duun. De Reis jetzt ins kochend Wasser unn je noo Packungsanleitung 10 – 15 Minudde koche.
Die Paprigaaschoote uffem Deller hälftich uffschneide, unn medd eme gudde Scheppleffel Reis medd ner gudd Boll Sooß serwiere.

Noch e Anmerkung: Nadierlich kamma die Füllung aa ohne Firlefanz, z.B. wie e Flääschkiechelches-Dääg mache.

De Kichebulle winscht Eich e Gurrer!

Bäikonn Bomb (Bacon Bomb) vum Grill

medd Gellerriewe-Mais-Salat
(e amerigaanischer Hackbroode in knuschpricher Speckhüll)

dodezu brauche mir: (fa vier Persone)

1 Kilo Hackflääsch, gemischt
2 Schtigg Eier
100 Gramm Weckmehl
3-4 Pack Bacon in Scheiwe, geht aa Friehschtiggsspeck, am Beschte is, wamma de geraacht Schweinebauch beim Metzjer in e bissje dickere Scheiwe schneide losst
200 Gramm geriewener Kääs
2 Schtigg Zwiwwel, gewerfelt
1 Eßleffel Senneft, mittelscharf
1 Eßleffel Honich
5 Eßleffel Barbecue-Sooß, ich nemm es liebscht die Classic vunn HP
Salz, Peffer, Maggi, Paprigaapulver, Chiliflocke
Grillschale, Alufolie, evtl. Backpapier
vorher uff youtube gugge, wie es Speckgitter gemach werd!

So geht’s weiter:

Es erscht stelle mir die Füllung her, dodezu mische mir es Hack medd de Zwiwwel, de Eier, em Weckmehl, Senneft, e Teeleffel Salz, e Pries Peffer, Paprigaa unn e paar Spritzer Maggi in erer groß Schissel unn knete alles scheen dorch.
Dann stelle mir es Speckgitter wie uffem Bild her. Am Beschte vorher uff Youtube „bacon bomb speckgitter“ inngewwe unn sich angugge, wie das geht, de „Blackforrest barbecue“ zum Beispiel zeit das ganz gudd. Ich mache das uff eme große nasse Holzbrett, ma kanns aa uff Backpapier mache. Das Gitter werd dann met 2-3 Eßleffel vunn de Barbecuesooß ingepinselt, die Hackflääschmischung dann wie uff de Bilder druff verdeele, in die Mitt de Kääs streue unn noch die iwweriche Baconscheiwe leje. Das ganze dann wie e Deppich sesammerolle. Druff achte, daß es nedd uffreißt. Scheen medd de Hänn zu eme „Laib“ forme unn medd de Noot no unne uff die Grillschaal leje, wie uffem Bild. Zum Schluß die reschtlich Barbecuesooß mim Honig, Chiliflocke unn e bißje Wasser vermische unn de „Laib“ scheen innpinsele. Ab medd dem Ding uff de Grill unn bei etwa 160 Grad een bis eenehalb Schtunn grille. Geht nadierlich aa im Backowe. Wamma noch Marinaad iwwerich hat, kamma nadierlich nochemol noopinsele. Wann die Zeit erum unn de Speck außerum scheen knuschprich is, uff em Schneidbrett in Scheiwe schneide unn serwiere.

Fa de Gelleriewe-Mais-Salat brauche mir:

1 Kilo Gelleriewe, gebutzt unn geraschpelt, grob odder fein, noo Beliewe
1 Doos Maiskerner
1 Zeebche Knowweloch
4 Eßleffel Melfor Essich
1 Teeleffel sießer Senneft
1 Teeleffel mittelscharfer Senneft
1 Teeleffel Zucker
5 Eßleffel Kraanewasser, hundsgeweenliches
Rapsöl o.ä., Salz, Peffer, Paprigaapulver, Maggi, evtl. Kräuter

Alle Zutaade metnanner vermische, mem Salz, Peffer, e paar Spritzer Maggi unn evtl. Salatkräuter abschmecke. De Salat e halb Stunn ziehe losse. Vor’m Serwiere nochemol dorchenanner mache.

Uffem Deller e Scheib Broode met em Salat anrichte. Dodezu frische Bagett odder Flitt serwiere.
De Kichebulle winscht e Gurrer!

Bärlaachkräämsupp medd Kräuterbutter Kruschtini

e nowelie Vorspeis

Dodezu brauche mir: (fa 4 Vorspeiseportione)

1 Schtigg Zwiwwel, mittelgroß, in Werfelcher
1 Teeleffel Zucker
1 Zeebche Knowweloch, kleen geschnied odder gedriggt
1 Essleffel gurrie Butter
1/2 Lidder Flääschbrieh (Instant odder Bouillon Pur vunn Knorr)
1 Schtigg Grumbier, in kleene Werfelcher
1 Bund Bärlaach (odder wie ich e Hand voll ingefrorner vunn letschtjohr 🙂 )
300 Millilidder Sahne
1/2 Becher Krääm fresch
Salz, Peffer, Muschkat
2 Schtigg Spitzweck odder e Schtigg Flitt odder Bagett, in dinne Scheibcher geschnied
1 Bißje Kräuterbutter

Unn so mache mir’s:

Die Zwiwwel mim Knowweloch unn em Zucker in de Butter anschwitze, die Brieh unn die Grumbier eninn unn köchle losse, bis die weech is. Derweil die Brotscheibcher medd Kräuterbutter bestreiche unn uff eme Backblech uff Backpapier ausleje. De Backowe uff 160 Grad anheize unn eninn demet, bis se scheen getooscht sinn.
De Bärlauch kleen geschnied unn die Sahne dezu in die Supp duun, korz uffkoche losse, Krääm fresch eninn, mem Pürierstab gudd dorchenanner mixe. Met em Salz, Peffer unn Muschkat abschmecke.
Im Suppedeller odder in de Terrine anrichte unn es goldbraun knuschpriche Brot dezu reiche.

Inwoltini alla Saltimbocca in pikanter Peffer-Sahne-Sooß

(Schnitzelrellcher wie die Idaliener se mache)

Dodezu nemme mir: (fa 4 Portione)

4 Schtigg scheene Schnitzel, Schwein odder Kalb
4-8 Scheiwe roher Schinke, idealerweis halt der aus Parma
4 Scheiwe Emmentaler Kääse paar Blätter Salbei odder zur Not aus em Gewerzregal
Salz, Peffer, Oliweöl zum Broode
Zahnstocher

So mache mir’s:

Die Schnitzel eenzeln in eme Gefrierbeidel scheen platt kloppe. Salz unn Peffer druff, dann met em Schinke, em Kääs beleje, de Salbei druff unn zu eme Röllche sesamme rolle. Met Zahnstocher fescht stecke. Im Oliweöl scheen anbroode. Warm stelle.
Wann die Sooß ferdich is, iwwer die Röllcher in die Pann duun.

Unn so geht em Olli sei pikantie Peffer-Sahne-Sooß: (langt fa vier Leit)

1 Teeleffel Bunter Peffer aus de Mühl
1 Schtigg Zwiwwel in Werfelcher
1/8 Lidder Weißwein
1/8 Lidder Flääschbrieh (siehe owwe)
200 Millilidder Sahne
2 Eßleffel Butter
1 Eßleffel Parmesan, geriewener
1 Teeleffel Zucker
Kräuter, Oliweöl, Salz, Peffer

De Peffer in eme kleene Topp medd de Zwiwwel unn em Zucker im Oliweöl anschwitze. De Weißwein eninn riehre, gudd inkoche losse. Die Flääschbrieh eninn, aa gudd reduziere losse. Die Sahne dezu, medd Salz, Peffer unn de Butter abschmecke. Medd de Kräuter unn em Parmesan gudd riehre. Mim Pürierstab gudd dorchmixe. Ferdich!

Zu der Kombi esse die Idaliener am Liebschte Spaghetti, mir esse das aa geere medd Pommes.

Noch e griener Salat debei – e Gedicht!

De Kichebulle winscht e Gurrer!