Rindflääsch (Tafelspitz) medd Meerrettichsooß unn Broodgrumbiere

Hausmannskoscht, simpel unn lecker, wie bei de Omma frieher!

Zutaade MeerrettichDie Zutaade: (fa etwa 4 Persone)

erscht es Flääsch:

800 gr bis e Kilo Tafelspitz, am Schtigg
2 Lidder Kraanewasser, hundsgeweenliches, je noo Greeß vum Topp
2 Schtigg Kuhwerfel (Instant-Rinderbrühe)

fa die Broodgrumbiere: (ich weeß, die hamma schunn mol gehaad)

1 knapp Kilo Grumbiere, feschtkochende wäre s bescht, vorwiechend feschtkochende gehn aa, gebutzt,in Werfelcher
1 Schtigg Zwiwwel, fein gewerfelt
1 Eßleffel Schweineschmalz, es geht aa met Öl zum Broode, met Schmalz schmackts halt besser
Salz,Peffer
e gurrie Broodpann

fa die Sooß:

100-150 gr Meerrettich, geriewener (aus em Tietche odder Glas, nur die ganz harte unner uns reiwe noch selwer)
1/2 Abbel, geschält unn gerieb (alternativ e Teeleffelche Zucker)
200 gr Sahne
3/4 Teeleffel Salz
1 Scheib Weißbrot odder 2 Scheiwe Tooschtbrot, ohne Korscht, in kleene Werfelcher geschnied
Essich-Gürkcher, wamma maan

Unn so mache mir’s:
Als allererschtes muß es Flääsch in de Topp, weil, das brauch gudd eendreiverdel bis zwee Stunn. Es muß scheen medd Wasser bedeckt sinn, die Briehwerfel (odder es Pulver) eninn unn korz uffkoche losse, erunner stelle unn bei leichter Hitz köchele losse.
De Schmalz in de Pann auslosse unn die Grumbierwerfel enninn,salze,peffere,noo finnef Minudde es erscht mol wenne unn so weider vunn alle Seite scheen kräftich anbroode, bis die Werfelcher goldich braune Kerschtcher krien. Die Hitz dann erunner stelle,e Deggel uff die Pann unn weiter broode, bis se dorch sinn (so etwa zwansich Minudde). Deggel erunner, unn die geschnitt Zwiwwel dezu, Deggel druff unn noch e bißje breedele losse,dann alles nochemol dorjenanner mache. Wann needich, nochemol met Salz unn Peffer noowürze.
Die Sooß sollt ma erscht mache, korz bevor es Flääsch ferdich is. Die Brotwerfelcher in eme kleene Dippe, medd drei-vier Kelle Brieh aus dem Topp, wo es Rinflääsch vor sich hin bruddelt, iwergieße, korz uffkoche, Sahne dezu, aa korz uffkoche loss. Hitz erunner stelle, de Meerettich unn es halwe Äbbelche dezu, salze unn gudd riehre. Abschmecke. Wenn ma hann will, daß es orndelich bitzelt, derf die Sooß jetzt nimie koche, sunscht veschwinnt die Schärfe medd de Zeit. Wer’s milder maan, muß eenfach noch länger bruddele losse, evtl. aa nochemol uffkoche, dann kenne ne aa die Kinnercher esse. Je noodem, mem Pürierstab gudd dorchmixe, do werd’s herrlich sämich.
Es Flääsch in feine Scheiwe schneide unn medd nerer Schipp Grumbiere unn de Sooß uff em Deller anrichte. E sauer Gürkche baßt wunnerbar dezu.

Noch e Tipp: Die Flääschbrieh nedd fort schitte! Das wär jo viel se schaad! Die kamma wunnerbar nemme als Sooße odder Suppe Grundlaach! (Kamma aa ingefriere)

Rindflääsch medd Merrettich

De Kichebulle winscht e Gurrer!

Hähnsche-Geschnetzeltes medd mediterranem Tatsch

-mol e bißje südlännischer Piff in die Kich gebrung!

Die Zutaade: (fa etwa 8 gudde Portione)

2 Pund Hähnschebruscht, in feine Streife geschnied
2 Schtigg Paprigaaschoode, rot odder geel, aa in feine Streife geschnied
1 Schtigg Zucchini, aa in feine Streife geschnied
2 Schtigg Zwiwwel, aa in feine Streife geschnied
2 Schtigg Tomaadee, odder 6-8 Cocktailtomaade, gewerfelt (mol was anneres wie Streife)
1-2 Zeebche Knowweloch, gepreßt
2 Eßleffel Tomaademark
3/4 Lidder Hinkelsfong, wann ich kenner hann, nemm ich geere „Bouillon pur Huhn“ vunn Knorr
100 Millilidder Weißwein
1 Eßleffel Zucker
1 Becher Krääm fresch
2 Eßleffel Parmesan, geriewener
Rosmarin, Thymian, Paprigaapulver, Salz, Peffer, Oliweöl zum Broode (Wamma kä Rosmarin unn Thymian deheem hat, kamma aa e Gewerzmischung „Kräuter der Provence odder „Pizzagewürzmischung“ nemme)

So mache ma’s:

In erer groß Pann odder Topp 4 EL Oliweöl heißmache unn es Flääsch drin scheen anbroode losse, medd eme Teeleffel Salz unn e bißje Peffer werze. Es Flääsch aus de Pann nemme, warm stelle unn die Zwiwwele in de Pann medd de Kräuter/-mischung (etwa 1 TL, muß ma e bißje vorsichtich sinn, sunscht schmackt’s zu streng),em Zucker unn em Knowweloch anschwitze. Wann’s scheen bräunt, es Gemies dezu duun, medd em Weißwein ablösche unn scheen reduziere losse. De Hinkelsfong dezu, e paar Minudde bruddelle losse, 2 TL Salz, 1 TL Paprigaapulver, Krääm fresch, Parmesan unn es Flääsch eninn, gudd umriehre unn die Hitz erunner stelle. Noch etwa finnef Minudde ziehe loss unn ewentuell die Sooß medd Soßebinner noo Beliewe sämicher mache. Wer maan, kann medd Chilli schärfer noowerze.
Anstelle de Hähnschebruscht kamma nadierlich aa Putebruscht/Geschnetzeltes nemme.

Dodezu basse Nudele in alle Variatione odder aa Reis.

De Kichebulle winscht e Gurrer!