Kategorie: Weemer Küchebulle

Weemer Küchebulle

Hiehnerfrikassee wie bei Oma Helene

Hiehnerfrikassee „Oma Helene“ medd Reis – wie sellemols

frikass3

Dodezu brauche mir: (fa etwa 4-5 Persone)

1 Kilo Hinkelsflääsch, in mundgerechte Schtigger (entwedder ihr koche eich e Suppehuhn,odder hole eich gegarte Hiehnerbrüschtcher, odder nemme es iwweriche Hähnche vum Grill, wie ich es gemacht hann)
1 Deesje Erbse (aa geere Erbse medd Möhrcher)
1 Schtiggche Friehlingszwiwwel odder e Putsche Schnittlaach, geschnied
1 Glas Champignons
400 Millilidder Hiehnerbrieh (falls ihr kä Suppehinkel gekocht hann, nemme ner z.B. Bouillon pur Huhn von Knorr)
100 Millilidder Sahne
150 Millilidder Weißwein, billicher
40 Gramm Butter
30 Gramm Mehl
Salz, Peffer, Maggi

Fa die Sättichungsbeilaache:

3 Tasse Reis
1 Topp hundsgeweenliches, gesalznes Kochwasser (fa de Reis)

frikass1

Unn so mache mir’s:

Erscht mache mir mol e Mehlschwitz. Die Butter im Topp schmelze, dann vorsichtich unner ständichem Riehre mim Holzleffel noo um noo es Mehl eninn riesele, bis es e scheenie kremichie Konsistenz hat, e bisje anschwitze (nedd anbrenne!) losse unn medd so viel Brieh ablösche, daß es scheen sänich werd. De Wein unn es Flääsch eninn unn unner ständichem Riehre e bißje uffkoche losse. Dodebei uffbasse, daß es unne im Topp nedd angeht. Hitz erunner stelle, die Erbse unn die Champignons medd de Friehlingszwiwwel dezu, Hitz ganz schwach stelle, zwee Minudde bruddelle losse unn die Sahne eninn riehre. Medd em Salz, Peffer unn Maggi abschmecke. Wem es zu sämich is, nommo Brieh noo schitte.
Noch e Tipp: E Eckelche Schmelzkääs eninn riehre. Selbstverständlich kamma aa die klassische Gemiese-Auswahl eninn duun: Erbse/Gelleriewe/Spargel. Ganz noo Geschmack.
De Reis noo Packungsanleitung zubereite unn e Boll Reis medd ner Boll Frikassee uffem Deller anrichte.

De Küchebulle winscht e Gurrer!

Weemer Küchebulle

Fruchtiches Fisch-Cörrie (Curry) – Fisch mol annerscht

Dodezu brauche mir: (fa etwa 4-6 Persone)
600-800 Gramm Seelachsfilet, in mundgerechte Schtiggscher geschnied
1 Schtigg großie Tomaat, gewerfelt
1-2 Schtigg Friehlingszwiwwel odder e halwie Stang Laach, fein geschnied
1 Schtigg großie Zwiwwel, gewerfelt
1 Schtigg Paprigaaschoot, rot, in Werfel geschnied
1 Doos Aprikose, odder 5-7 frische, in Werfelcher geschnied, (de Saft uffheewe)
250 Millilidder Gemiesebrieh (Instant)
1 Zeebche Knowweloch, fein gehackt odder gepreßt
200 Millilidder Kokosmillich
200 Millilidder Sahne
2 Eßleffel rote Currypaste odder Red Thai Curry Gewerzpulver
Öl zum Broode, Salz, Peffer, Zucker

wer’s maan, kann noch e Dösje Erbse drunner duun, mir hann’s nedd gebraucht

unn so werd’s was:

Die Zwiwwel mim Knowweloch unn em Curry im Öl anschwitze, die Kokosmillich unn die Gemiesebrieh dezu unn e paar Minudde bruddelle losse. Dann es ganze Gemies unn die Aprikose dezu, zum Schluß de Fisch unn dann so etwa e verdel Stünnche köchele losse. Zum Schluß die Sahne eninnriehre unn met em Peffer, Salz, Zucker unn mim Aprikose Saft aus de Doos süßlich pikant abschmecke.

Dodezu reiche mir Basmatireis, so etwa 450 – 500 Gramm fa 4-6 Persone.

De Kichebulle winscht e Gurrer!

Weemer Küchebulle

Schweinegeschnetzeltes Balkan Art medd Curryreis

-mol e bißje annerschter wie Zürcher Geschnetzeltes…..
(fa etwa 4 Persone)

Das brauche mir

Dodezu brauche mir:

Fa es Flääsch:

600 Gramm Geschnetzeltes vum Schwein
2 Schtigg Zwiwwelle, in halwe Ringe geschnied
2 Schtigg Paprigaaschoote, in feine Streife geschnied
1 Glas Champignons, frische gehn nadierlich aa, so etwa 250 Gramm
2 Zeebcher Knowweloch, gehackt odder gepreßt
1 Becher Schmandt
100 Millilidder Sahne
200 Millilidder Kraanewasser, hundsgeweenliches
2 Eßleffel Senneft, scharfer
1 Eßleffel Soßebinder

Salz, Peffer, Paprigaapulver, Oliweöl zum Broode
Thymian, Majoran, Oregano – wamma die drei Kräuter eenzeln nedd do hat, kamma aa „Kräuter der Provence“ Mischung nemme
wamma maan, noch e Dösje Gemüsemais drunner mache

unn so werd’s gemach:

Die Flääschstreife würze unn scharf im Öl anbroode. Dann die Paprigaastreife, Zwiwwelle, Champignons dezu unn finnef Minudde gare losse. (wie owwe beschrieb, kamma noch e Dösje Gemüsemais drunner mache) De Schmand, es Wasser, de Senneft unn de Knowweloch dezu unn nochemol drei Minudde koche losse. Hitz erunner stelle, die Sahne eninn unn medd em Salz, Peffer, Paprigaapulver gudd abschmecke. Nimie hoch koche losse, daß es Gemies noch Biß hat. Noo Bedarf medd Soßebinner binne.

Fa de Reis:

5-6 Tasse Basmatireis
1 Päckche Cashew-Niss, naduur odder gesalz (die längliche, niereförmiche sinn das)

Salz, Currypulver

De Reis in reichlich Salzwasser noo Packungsanleitung gar koche, abschitte, e bißje abtrobbe losse unn serick im Topp medd em Currypulver scheen hell gääl dorchenanner mache. Beim Anrichte uffem Deller e Hand voll Niss iwwer de Reis streue.

De Kichebulle winscht Eich e Gurrer!

Weemer Küchebulle

Brauhausgulasch medd Spätzle unn Mausohrsalat

deftichie Hausmannskoscht a la bonheur…….

Dodezu brauche mir: (fa etwa 6 gudde Portione)

1 Kilo Gulasch vunn de Wutz
2 Schtigg Zwiwwele, gewerfelt
2 Zeebcher Knowweloch, gedriggt
300 Gramm Suppegemies (Laach, Gellerrieb, Sellerie, Peterling), kleen geschnied
1 Eßleffel Senneft, mittelscharf
2 Eßleffel Tomaademark
100 Millilidder Sahne odder e halwer Becher Krääm fresch
1 Flasch guddes Bier (e halwer Lidder), kenn stark gehopptes Bier nemme, also kenn Urpils odder Jever!!! (Sunscht werd das bitter wie Gall!) Am Beschte e gudd Malzisches, Dunkles, Bock odder Weize geht aa.
1 Eßleffel Zucker
1 Eßleffel Gemiesebrieh (Instant)
1 Dippche Bouillon pur Rind vunn Knorr odder e Buillon-Werfelche o.ä.
Schmalz odder Öl zum Broode
hundsgeweenliches Kraanewasser, Salz, Peffer, Paprigaapulver, Soßebinder

1 Kilo Spätzle aus de Tuut

fa es Salätche:

300 Gramm Mausöhrche (Feldsalat)
1 Zeebche Knowweloch, gedriggt
1 Teeleffel sießer Senneft
1 Teeleffel mittelscharfer Senneft
75 Millilidder Melfor Essich
1 Maul voll Kraanewasser
2 Eßleffel Rapsöl (odder anneres)
1 gestrichner Teeleffel Salz
1 gestrichner Teeleffel Zucker
Peffer, Paprigaapulver, Maggi

So mache mir’s:

Es Gulasch in eme große Topp mim Schmalz (odder Öl) unn em Zucker gudd anbroode. De Flääschsaft gudd inkoche losse. Es Tomaademark, de Knowweloch unn die Zwiwwele medd anröschte. Dann die Flasch Bier eninnschitte, es Gemies unn de Senneft dezu, es Bouillon eninn unn e guddie Stunn, bei reduzierter Hitz, medd Deckel uffem Topp scheen inkoche losse. Zwischedrin mol Wasser nooschitte.
Je länger es kocht, desto besser werd’s, das heeßt, es kann a geere noch e halb Stunn länger bruddelle!
Wanns Flääsch scheen zart is unn fascht zerfallt, die Sahne odder die Krääm Fresch eninnriehre, kräftich Paprigaapulver eninn unn met em Salz, Peffer unn de Gemiesebrieh abschmecke. Medd Soßebinder andicke, je noo Geschmack.
Die Spätzle noo Packungsanleitung zubereite.
De gebutzte Feldsalat gudd abtropse losse. In de Salatschissel die Zutate fa es Dressing, außer em Öl, metnanner verriehre, erscht zuletscht es Öl ninn riehre unn de Salat scheen dorchenanner mache. Abschmacke unn serwiere.
Anstatt Spätzle schmacke aa Knepp o.ä. zum Gulasch.

De Kichebulle winscht e Gurrer!

Weemer Küchebulle

Hoorische Knepp medd Speckrahmsooß unn Kraut

e saarlännisches Nationalgericht, eenfach unn gudd, so simpel, das kann jeder noomache

Dodezu brauche mir: (fa etwa 8 fauschtgroße Knepp, ausreichend fa 4-5 Persone)

2 Kilo Grumbiere
1 Päckche Knödeldääg halb unn halb (Knödelteig, trocken, etwa 300 gr.),
erspart denne Andeel an gekochte Grumbiere unn die geriewene misse nedd im Gescherrduuch ausgedriggt werre, de Unnerschied schmeckt sowieso kenner, nur die Foozer 🙂
1 Teeleffel Salz
1 Pries Peffer

fa die Sooß:

150-200 Gramm gewerfelter Schinke odder Därrflääsch
1/2 Lidder Sahne
1 Teeleffel e gehäufter, Gemiesebriehpulver, Instant
2 Eßleffel Öl zum Broode

So mache mir’s:

Zwee große Töpp uffstelle unn leicht gesalznes Kochwasser zum Bruddelle bringe. Die geschälte Grumbiere in e Schissel reiwe, am Beschte nadierlich in de Kichemaschin. In de Schissel dann etwa 3/4 vun de Grumbier-Brieh wegschitte, es Knödelpulver eninn mache, Salz unn Peffer unn alles scheen zu eme nedd zu trockne Dääg knete. Wann er zu trucke is, eenfach e Grumbier meh eninnreiwe. De ferdiche Dääg nedd zu lang stehn losse, sunscht zieht er widder Wasser. Scheene, fauschtgroße Knepp forme unn mem Seihleffel vorsichtich ins leicht kochend Wasser losse, es sollt nedd zu stark koche, evtl. die Hitz reguliere. Die Knepp brauche, je noo Größe nadierlich, so etwa 20-30 Minudde. In eme Topp nedd meh wie vier bis fünnef Knepp eninn duun, so dass se scheen frei schwimme kenne.
Derweil es Kraut uffstelle. Fa die Sooß es Därrflääsch im Öl in eme Dippche anbroode, medd de Sahne ablösche, es Gemiesebriehpulver eninn unn kurz eemol schaumich uffkoche losse (Vorsicht, dass es nedd iwwerkocht, sunscht gebbt’s Saurei unn stinkt), dann erunner vunn de Hitz unn warm halle.
Wann die Zeit fa die Knepp erum is, mol enner aus em Wasser fische unn uffschneide, sollt er in de Mitt noch e bißje roh sinn, noch finnef Minudde dranhänge.

Uffem Deller e Knopp gehälft, medd Sooß iwwergieße unn medd ner Schipp Kraut serwiere.

De Kichebulle winscht e Gurrer!

Weemer Küchebulle

Gefillde Paprigaaschoote, griechisch Art…

in Tomaadesooß medd Basmatireis
(nedd steuerfrei, awwer dodefoor aa nedd E.U. gefördert!)

Dodezu brauche mir: (fa 4-5 Persone)

1 Kilo Rinderhack
5-7 Schtigg Paprigaaschoote, scheene große, gebutzt unn de Deckel abgeschnied, die Deckele mische mir ganz kleen geschnied unner’s Hack unn in die Sooß
200 Gramm Fetakääs odder wer’s noch griechischer maan, richticher Schoofskääs, in Werfelcher
100 Gramm geriewener Kääs
3 Eßleffel schwarze Oliwe, fein geschnied (wer’s nedd maan, weglosse)
1 Päckche passierte Tomaade
2 Schtigg Zwiwwelle, in feine Werfelcher
2-3 Zeewe Knowweloch, gepreßt odder fein geschnied
2 Eßleffel Tomaademark
100 Millilidder Sahne
1 Eßleffel Zucker
1 Humpetass Basmatireis (sinn so etwa 250-300 Gramm)
2 Eßleffel Oliweöl
Salz, Peffer, Gemiesebrieh Instant, evtl. Gyros-Gewerzmischung, hundsgeweenliches Kraanewasser

So mache mir’s:

Es Hack in erer Schissel medd de Hälft kleengeschniedene Paprigaadeckelscher unn em dreivertelse Feta/Schoofskääs, de Hälft Zwiwwelwerfelcher, de Oliwe, enner gepreßt Knowwelochzeeb, eme gestrichne Eßleffel Salz unn ner gudd Pries Peffer orndelich dorchknete. Anstatt em Salz/Peffer kamma aa e Gyros-Gewerzmischung nemme. Die Masse dann in die Schoote gudd eninndrigge. In ner Ufflaafform dann bei 200 Grad in de vorgeheizte Backowe stelle (etwa 15-20 Minudde). Sollt vun dere Hackflääsch-Masse ebbes iwwerich bleiwe, eenfach noher medd in die Sooß dezu duun. Es Wasser fa de Reis uffstelle. Derweil in eme Topp im Oliweöl de Rescht vunn de Zwiwwelwerfele unn em Knowweloch, medd eme Eßleffel Zucker anschwitze, Tomaademark medd anreeschte, die passierte Tomaade ninnriehre unn medd em reschtliche Fetakääs, de reschtliche Paprigaaschtickcher unn e bißje Kraanewasser uffkoche. Wer’s maan, kann dort aa noch e paar Olive eninnschnibbele. Die Sahne dezu riehre. Medd Salz unn Peffer abschmecke. Evtl. noch e Teeleffel Gemiesebriehpulver eninnriehre. Die Ufflaafform aus em Owe eraus hole (Vorsicht heiß!), de Owe uff 160 Grad erunner stelle, die Tomaadesooß in die Ufflaafform fille, scheen um die Schoote erum verdeele, e Leffel Sooß iwwer jedie Schoot unn noch e bißje geriewener Kääs driwwer, de rescht Kääs in die Sooß. Die Form nochmol, bis de Reis gudd is, in de Owe duun. De Reis jetzt ins kochend Wasser unn je noo Packungsanleitung 10 – 15 Minudde koche.
Die Paprigaaschoote uffem Deller hälftich uffschneide, unn medd eme gudde Scheppleffel Reis medd ner gudd Boll Sooß serwiere.

Noch e Anmerkung: Nadierlich kamma die Füllung aa ohne Firlefanz, z.B. wie e Flääschkiechelches-Dääg mache.

De Kichebulle winscht Eich e Gurrer!