e bekanntes, herzhaftes Inntoppgericht aus Siedamerigaa, je noo Werzung brennt’s zwee mol!
die Zutaade (fa so etwa 6-8 Portione, je noodem, was fa Fresser komme):
1 1/2 Pund Rinnerhackflääsch (etwa 750 gr)
2 Schtigg Zwiwwele, gewerfelt
3 Zeewe Knowweloch, gehackt odder gepreßt
1 Pund Tomaade, in Schtigger, odder zwee Dose Pizzatomaade, medd em Saft
1 Pund Kidney-Bohne aus de Doos
2 Schtigg Paprigaaschoode, in Schtigger geschnied, die Farb is egal
2 Schtigg Chillischoote (gehackt) odder anner scharf Zeich (aus de Gewerzmiehl odder Tabasco o.ä.)
1/2 Pund Maiskerner aus de Doos
2 Rippcher Bitterschokolaad medd minnischens 70% Kakao
1 Eßleffel Zucker
3 Eßleffel Oliweöl zum Broode
2 Eßleffel Gemiesebrieh odder Bulliong Pulver
etwa 3/4 Lidder Kraanewasser, hundsgeweenliches
Salz, Peffer, Paprigaapulver, Kreizkümmel, Kräm fresch
unn so werd’s gemacht:
Hackflääsch im e große Topp im Öl anbroode, Zucker unn Zwiwwele dezu unn glasich werre losse, medd de Tomaade unn dem Saft verriehre, die Gewerze dezu, gehackte Chillis dezu, immer emol umriehre, etwa e Verdel Stunn bei wennicher Hitz bruddele losse. Die Schokolaad eninn breckele, es Gemies, es Brieh-Pulver medd em Wasser unn de Knowweloch eninn, gudd riehre unn noch emol e Verdel Stunn bruddele losse. Ewentuell noch Wasser noofille, wann ma’s „suppicher“ maan. Medd de Gewerze gudd scharf, noo Geschmack, noowerze.
Im Suppedeller met eme Klecks Kräm fresch in de Mitte anrichte, dezu baßt am Beschde e gudd Flitt odder Bagett.
Noch besser werd’s, wann’s e Daa später nochmo uffgewärmt gess werd.
Unn denke dran, ihr Leit: Je noodem, wie wild ihr’s werze, es brennt zwee mol!!!
De Kichebulle winsch e Gurrer!
