Semmelknepp unn Pilzrahmsooß

Semmelknepp

Die Zutate fa vier Persone (so in etwa)
6 Schtick Weck (alde, kenne aa schunn trugge sinn, egal, ob weiße odder Rogge o.ä.)
3 Eßleffel gehackter Peterling (kamma aa TK. nemme, muss kä frischer sinn)
10 Gramm gurrie Butter

1 Schtick Zwiwwel, fein gehackt
250 Millilidder Millich (je truckener die Weck, evtl. aa e bißje meh)
3 Schtick Eier
Salz, Peffer

Erscht emol die Weck in dinne Scheibcher odder in Werfelle in e großie Schissel eninn schneide,
die gehackt Zwiwwel in de Butter e bißje anschwitze unn de Peterling aa, die Millich etwa lauwarm mache, nedd koche losse. Dann die Millich iwwer die Werfele schitte, die Zwiwwel unn de Peterling dezu unn ziehe losse. Derweil die Eier met em Salz unn Peffer vequirle unn dann alles sesamme scheen fescht zu eme daatschiche Dääg vemische. Wie owwe beschrieb, eventuell noch Millich dezu duun.
Sollt der Dääg se nass sin, kamma sich met Weckmehl nochmo helfe. Dann met de Griffelle etwa tennisballgroße Knepp forme unn in siedendem,awwer nedd sprudelnd kochendem Wasser so zwanzich Minudde ziehe losse, se derfe nur nedd koche,sunscht falle se ausenanner.
Noch e Tipp: Wamma will, kamma aa Speckwerfelcher met de Zwiwwele anbroode, dann hat ma Speckknepp.

Pilz-Rahmsooß

300 Gramm Pilze (Stäänpilze wäre grad gudd im Herbscht)
1 Schtick Zwiwwel, fein gehackt
1/8 Lidder Weißwein (derf aa Pälzer sinn)
1/8 Lidder Broodesaft (Fong (Fonds)) (wamma kenner hat, kamma aa „Bouillon pur“ vunn Knorr nemme,weil, in der Not nemme mir aa Knorr)
200 Millilidder Sahne
3 Eßleffel Oliweöl
2 Eßleffel gurrie Butter
Salz, Peffer, Zucker, Kräuter, geriewener Parmesankääs

Die Pilze wäsche unn schneide, in eme Topp die Zwiwwel mim Oliweöl unn eme gestrichene Eßleffel Zucker anschwitze, bis alles so leicht braun werd. Die Pilze eninn unn nochemol e bißje anschwitze.
De Wein dezu, innkoche losse, wann die Pilze gar sinn, absiewe, beiseit stelle unn de Pilzfong met em Broodesaft nochmo innkoche losse. Sahne dezu unn met Salz, Peffer unn Butter abschmecke. Etwa enn bis zwee gehäufter Eßleffel vunn de gegarte Pilze widder in die Sooß mache,die Kräuter unn de geriewene Parmesan dezu unn mim Pürierstab orndlich dorchmixe. Die reschtliche Pilze dezu unn nochemol gudd wärme.
Noch e Tipp: Die Sooß basst nadierlich nedd nur zu Semmelknepp….