e echter Klassiker der Hausmannskoscht, nedd nur fa Kinner
die Fischstääbcher mache ma nadierlich nedd selwer, ma kann jo viel selwer mache, awwer ich mache mich jo nedd zum Äbbelche….
Uns schmacke die vum Käpten Iglo am Beschte, in de Pann gebrood (wer’s fettärmer maan, soll se halt im Backowe mache), wie’s geht, ihr Leit, schrebt der Käpten uff de Packung!
Es Rezept fa de Roth’sche Haus-Grumbiersalat is in Anlehnung an de schwäbische „Grumberdsalaad“, der jo traditionell medd Brieh gemacht werd, unn nedd medd Majonääs.
Zutaade fa de Grumbiersalat: (gebbt e Schissel fa etwa 5 Persone)
2 Kilo Grumbiere, feschtkochende, vorwiechend feschtkochende gehn zur Not aa
200 Gramm Schinkespeck odder Schinke,gewerfelt
1 Schtigg Zwiwwel, e scheenie großie, in Werfelcher
1 Zeeb Knowweloch
1 Eßleffel Zucker
2 Eßleffel Gemiesebrieh- odder Bouillong-Pulver
5 Eßleffel Melfor-Essich (de Original)
1 Eßleffel Senneft, mittelscharf
4 Eßleffel Öl (muß zum Broode geeichnet sinn, weil mir domet aa de Speck anbroode)
300 Millilidder Kraanewasser, hundsgeweenliches
Salz, Peffer, Paprigaapulver, Maggi, Schniedlaach in Röllcher
Die Grumbiere koche (etwa 20 Minudde), met de Gawwel gugge, ob se dorch sinn, abschitte, abschrecke unn abkiehle losse.
Derweil in eme Töppche die Speckwerfel mim Zucker im Öl auslosse, die Zwiwwelwerfel dezu unn glasich werre losse,wann de Zucker scheen braun werd, also karamelisiert am Boddem, medd em Kraanewasser ablösche, es Brieh-Pulver innriehre unn korz uffkoche losse. Topp vum Herd nemme, die Knowwelochzeeb eninnpresse, de Essich eninn, medd etwa 1 Teeleffel Salz, met em Senneft, em Peffer, Paprigaa unn e paar Spritzer Maggi, gudd riehre unn gudd werzich abschmecke. Dann noch de geschnied Schniedlaach dezu. Finnef Minudde ziehe losse.
Die noch warme Grumbiere pelle unn in Scheiwe schneide. In erer scheen Schissel medd de gudd warm Sooß vemische, bis er scheen „schlotzt“, unn finnef Minudde ziehe losse. Prowiere unn ewentuell nommo noowirze. De Salat schmackt am Beschte, wann er warm is.
Noch e Tipp: Wamma de Salat vormache will, z.B. fa e Feschtche oweds, kamma jo die Sooß dann nommo heiß mache. Die fertich gekochte unn geschniedne Grumbiere, sofern die Schissel nedd se groß is, wärm ich dann in de Mikro nommo lauwarm uff.
De Kichebulle winscht e Gurrer!
