Gefillde Paprigaaschoote, griechisch Art…

in Tomaadesooß medd Basmatireis
(nedd steuerfrei, awwer dodefoor aa nedd E.U. gefördert!)

Dodezu brauche mir: (fa 4-5 Persone)

1 Kilo Rinderhack
5-7 Schtigg Paprigaaschoote, scheene große, gebutzt unn de Deckel abgeschnied, die Deckele mische mir ganz kleen geschnied unner’s Hack unn in die Sooß
200 Gramm Fetakääs odder wer’s noch griechischer maan, richticher Schoofskääs, in Werfelcher
100 Gramm geriewener Kääs
3 Eßleffel schwarze Oliwe, fein geschnied (wer’s nedd maan, weglosse)
1 Päckche passierte Tomaade
2 Schtigg Zwiwwelle, in feine Werfelcher
2-3 Zeewe Knowweloch, gepreßt odder fein geschnied
2 Eßleffel Tomaademark
100 Millilidder Sahne
1 Eßleffel Zucker
1 Humpetass Basmatireis (sinn so etwa 250-300 Gramm)
2 Eßleffel Oliweöl
Salz, Peffer, Gemiesebrieh Instant, evtl. Gyros-Gewerzmischung, hundsgeweenliches Kraanewasser

So mache mir’s:

Es Hack in erer Schissel medd de Hälft kleengeschniedene Paprigaadeckelscher unn em dreivertelse Feta/Schoofskääs, de Hälft Zwiwwelwerfelcher, de Oliwe, enner gepreßt Knowwelochzeeb, eme gestrichne Eßleffel Salz unn ner gudd Pries Peffer orndelich dorchknete. Anstatt em Salz/Peffer kamma aa e Gyros-Gewerzmischung nemme. Die Masse dann in die Schoote gudd eninndrigge. In ner Ufflaafform dann bei 200 Grad in de vorgeheizte Backowe stelle (etwa 15-20 Minudde). Sollt vun dere Hackflääsch-Masse ebbes iwwerich bleiwe, eenfach noher medd in die Sooß dezu duun. Es Wasser fa de Reis uffstelle. Derweil in eme Topp im Oliweöl de Rescht vunn de Zwiwwelwerfele unn em Knowweloch, medd eme Eßleffel Zucker anschwitze, Tomaademark medd anreeschte, die passierte Tomaade ninnriehre unn medd em reschtliche Fetakääs, de reschtliche Paprigaaschtickcher unn e bißje Kraanewasser uffkoche. Wer’s maan, kann dort aa noch e paar Olive eninnschnibbele. Die Sahne dezu riehre. Medd Salz unn Peffer abschmecke. Evtl. noch e Teeleffel Gemiesebriehpulver eninnriehre. Die Ufflaafform aus em Owe eraus hole (Vorsicht heiß!), de Owe uff 160 Grad erunner stelle, die Tomaadesooß in die Ufflaafform fille, scheen um die Schoote erum verdeele, e Leffel Sooß iwwer jedie Schoot unn noch e bißje geriewener Kääs driwwer, de rescht Kääs in die Sooß. Die Form nochmol, bis de Reis gudd is, in de Owe duun. De Reis jetzt ins kochend Wasser unn je noo Packungsanleitung 10 – 15 Minudde koche.
Die Paprigaaschoote uffem Deller hälftich uffschneide, unn medd eme gudde Scheppleffel Reis medd ner gudd Boll Sooß serwiere.

Noch e Anmerkung: Nadierlich kamma die Füllung aa ohne Firlefanz, z.B. wie e Flääschkiechelches-Dääg mache.

De Kichebulle winscht Eich e Gurrer!

Go Top