Werschingwickel medd Salzgrumbiere

Werschingwickel medd Salzgrumbiere

So muß das sinn, lecker Hausmannskoscht, wie bei Muttern!

Dodezu brauche mir: (fa etwa 10 bis 12 große Wickel)

IMG_20151115_122451

1,2 Kilo Hackflääsch, gemischt
1 Kopp Wersching
2 Schtigg Zwiwwelle, in Werfelcher
2 Zeebcher Knowweloch, gepreßt odder fein gehackt
3 Schtigg Eier
1 Tass Weckmehl
1 Eßleffel Senneft, mittelscharf
1 Becher Schmandt odder Krääm fresch
250 Millilidder Weißwein
3-4 Eßleffel Butter
1 Tass Mehl
Öl zum Broode, Salz, Peffer, Paprigaapulver, Muschkatnuss, Maggi
Zahnstocher odder Küchengarn

IMG_20151115_141514

unn so mache mir’s:

Die Werschingblätter, immer zwee-drei, in eme große Topp medd kochend Wasser zwee bis drei Minutte weech koche (blanchiere), daß se beim Wickele nedd breche, unn uff die Seit leje. Fa enner Wickel kamma zwee bis drei Blätter rechne. Das Kochwasser nedd fortschitte, das brauche mir noch. Fa die Füllung in eme Dippe es Hack medd de Eier, Weckmehl, Senneft, Salz, Peffer, Maggi, Paprigaa, de Knowweloch unn enner Hälft Zwiwwelwerfele gudd durchknete. Muschkatnuß drunner mache, awwer nedd zu viel. Dann die Blätter sortiere unn noo Größ uffdeele. Jeweils e Hand voll Füllung se erscht in e inneres helles Blatt unn dann nochemol e großes Außeblatt drumherum wickele unn medd Zahnstocher odder Küchegarn fixiere. In eme große Bräter die Wickel nooenanner im Öl scheen anbroode, bis die Blätter farb krien. Wann se all gebrood sinn, sesamme im Bräter medd em Wein ablösche. Dann medd em Blanchierwasser uff fülle unn circa e Stünnche schmore losse. Im Au behalle unn ewentuell noch Blanchierwasser noo fülle.
Fa die gudd Sooß duun mir in eme separate Topp die Butter schmelze, die anner Hälft vunn de Zwiwwelle glasich werre losse unn mim Mehl e Mehlschwitz mache, also vorsichtich es Mehl anröschte, ohne es anbrenne se losse. Medd eme gudde halwe Lidder Broodeflüssichkeet aus em Bräter, wo die Wickel drin sinn, ablösche unn inkoche losse. Medd Salz, Peffer, Butter unn em Schmandt abschmecke unn mim Pürierstab mixe. Die Wickel aus em Bräter nemme unn die Sooß zu de reschtlich Broodeflüssichkeet dezu, medd Soßebinner binne unn nochemol abschmecke. Die Wickel nommo fa e paar Minutte in de Sooß ziehe losse, fertich.

Dodezu basse am beschte Salzgrumbiere, weil ma die so scheen in die Sooß drigge kann.

De Kichebulle winscht e Gurrer!

IMG_20151115_145605

Bockbiergeschnetzeltes medd Farfalle

Bockbiergeschnetzeltes medd Farfalle

Deftich, kräftich, zackich – weil mer Bier nedd nur trinke kann

Dodezu brauche mir: (fa 4-5 Persone)

1 Kilo Schweinegeschnetzeltes
2 Schtigg Zwiwwelle, gewerfelt
2 Zeebcher Knowweloch, gepreßt odder fein gehackt
1 Eßleffel Senneft, mittelscharf
2 Eßleffel Tomaademark
100 Millilidder Sahne odder Krääm fresch
1 Flasch Bockbier, e halwer Lidder, ich hann es gudde Mönchshof genomm
1 Eßleffel Zucker
1 Eßleffel Gemiesebrieh, instant
1/2 Lidder Flääschbrieh, odder e Dippche Knorr Bouillon pur z.B.
Öl zum Broode, Salz, Peffer, Paprigaapulver, Sooßebinder

1 Pack Farfalle-Nudele, e halb Kilo

IMG_20151108_154636

unn so werd’s gemacht:

In erer hoch Pann es Flääsch im Öl anbroode, Zwiwwelle, Knobi unn de Zucker dezu, denoo es Tomaademark unn alles e bißje anröschte losse. Dann kommt es Bier eninn unn das ganze gudd inkoche losse. Die Flääschbrieh dezu unn nochemol e paar Minudde uffkoche. Medd em Senneft, de Gewerze unn de Sahne abschmecke.

Die Nudele noo Packungsanleitung zubereite.

Dodezu baßt nadierlich e griener Salat.

De Kichebulle winscht e Gurrer!

IMG_20151109_154109

Rindergulasch „Kircheneck“ medd gewalzte Bandnudele

Rindergulasch „Kircheneck“ medd gewalzte Bandnudele

medd e bißje viel meh Gemies drin, weil die Oma immer gesaad hott: „Mir misse spare, es Rindflääsch isch se deier!“

gulasch2
Dodezu brauche mir: (fa 4-5 Persone)

1 Kilo Rindergulasch, kleen geschnied, so 1 cm Werfelcher
2 Schtigg Zwiwwel, grob geschnied
2 Zeebcher Knowweloch, gehackt odder gepreßt
3 Schtigg Paprigaaschote, gebutzt unn geschnied
250 Gramm Suppegemies, (Gellerrieb, Sellerie, Laach), in Werfelcher
1 Doos Pizzatomaade, alternativ drei Tomaade in Werfele geschnied
300 Millilidder Rotwein, kää so schlechter
3/4 Lidder Flääschbrieh, Instant, Würfel odder Bouillon pur Rind vunn Knorr
1 Eßleffel Zucker
3 Scheiwe Schmelzkääs
Oliweöl zum Broode, Salz, Peffer, Paprigaapulver, Maggi, Tomatemark hundsgeweenliches Kraanewasser zum nooschitte

1 Pack gescheite Bandnudele (nedd immer die aus em unnerschte Regal nemme)

gulasch1
Unn so werd das was:

Die Flääschwerfel mim Zucker im Öl anbroode. Wann es Flääsch Wasser loßt, so lang bruddelle losse, bis die Brieh ziemlich vedampft is. Die Zwiwwel unn de Knowweloch dezu, e gudder Eßleffel Tomatemark dezu unn unner Riehre bißje röschte losse. Kräftich medd em Salz, Peffer unn Paprigaapulver werze. De Rotwein eninn, riehre unn gudd inkoche losse. Die Flääschbrieh dezu, umriehre unn gudd zwee bis drei Stunn bei reduzierter Hitz schmore. Zwischedrin als emol e Maul voll Kraanewasser noo schitte. Zum Schluß de Schmelzkääs eninnriehre, medd de Gewerze unn e paar Spritzer Maggi nommo deftich abschmecke.

Die Bandnudele noo Packungsanleitung zubereite.

E guddie Boll Gulasch uffem Deller Nudele serwiere, nedd se knapp, mir wolle jo satt wirre.

E Tipp:
Wie jeed Gulasch schmeckt das am nägschte Daa nochemol so gudd! 😉

De Kichebulle winscht e Gurrer!

Hähnchebruschtfilets medd Basmatireis an Curry-Mango-Sooß

Hähnchebruschtfilets medd Basmatireis an Curry-Mango-Sooß

currymango2

simpel unn herrlich exotisch

Dodezu brauche mir: (fa 5 Persone)

5 Schtigg Hähnchebruschtfilets
3 Tasse Basmatireis
2 Eßleffel Butter
1 Eßleffel Zucker
1 Schtigg Zwiwwel, fein gewerfelt
1 Zeebche Knowweloch, fein gehackt odder dorchgedriggt
2 Eßleffel Curry Pulver, am Beschte aus em gudde Gewerzlaade odder aus em Türkemarkt in Humborch z.B.
100 Millilidder Weißwein
1/2 Lidder Hinkelsbrieh, Instant odder Bouillon pur vunn Knorr
1 Schtigg mittelgroßer Abbel, geschält, in Werfelcher geschnied
1/2 Schtigg Mango, geschält, in Werfelcher geschnied
50 Millilidder Orangesaft, frisch
300 Millilidder Sahne odder e Becher Schmandt
1 Schtigg Paprigaaschoot, rot, gewerfelt
1 Schtigg Paprigaaschoot, grien, gewerfelt
Soßebinder, Salz, Peffer, Oliveöl

Unn so werd’s gemach:

Die Butter im Topp schmelze, die Zwiwwel unn de Knobi medd em Zucker anschwitze. Die Mango unn de Abbel eninnriehre, kurz andünschte, de Curry unn de O-saft dezu unn gudd mische. De Wein eninn schitte unn uffkoche losse. Medd de Hinkelsbrieh ufffülle unn alles gudd weech koche losse. Dann mim Pürierstab fein mixe. Die Sahne dezu, korz uffkoche unn medd Salz, Peffer unn eventuell noch e bißje Curry noo würze. Noo Bedarf medd Sooßebinner andicke.

De Reis noo Packungsanleitung koche.

Beim Anrichte medd de in Werfelcher geschnied Paprigaaschoot garniere.

De Kichebulle winscht Eich e Gurrer!

 

currymango1

Pute Geschnetzeltes noo Asia Art medd Basmatireis

(mol ebbes Anneres vunn weit weit her, unn trotzdem schnell unn lecker)

das brauche mer fa etwa 4 Persone:

gudd 300 gr Basmatireis (geht aa Parboiled, awwer der do schmeckt besser)
800 gr Putegeschnetzeltes odder Putebruscht, in Streife geschnied
2 Schtigg Paprigaaschoode, gebutzt unn kleen geschnied
1 Doos Maiskerner
2 Schtigg Zwiwwelle, in halwe Ringe geschnied
2 Zeebcher Knowweloch, fein gehackt odder gepreßt
2 Schtigg Tomaade, kleen geschnied
100 Millilidder Sahne odder Krääm fresch
Kraanewasser, hundsgeweenliches
Salz, Currypulver, Sojasooß, Zucker, Asia-Gewerzmischung (wamma kenn hat, kamma medd Koriander, Kurkuma, Chili, Kreuzkümmel unn Ingwer werze)
Öl zum Broode
idealerweis e Wok, nadierlich geht das aa in erer Pann

unn so mache mir das:

Erscht emol es Wasser fa de Reis in eme große Topp uffstelle, e Eßleffel Salz ins Wasser dun.
Es Öl im Wok/Pann heiß mache, es Fleesch medd eme gehäuft Teeleffel Zucker scharf anbroode,dann die Zwiwwelle dezu unn andünschte losse. Medd em Asiagewerz gudd werze. Wann derweil es Kochwasser fa de Reis im Topp schunn bruddelt, de Reis als emol eninn schitte, der brauch gudd e Verdelstunn. Es Flääsch im Wok medd e bißje Kochwasser vum Reis ablösche, die Tomaade eninnriehre, Deckel druff unn e paar Minudde bruddele losse. Es Flääsch muß dorch sinn. Dann es reschtliche Gemies eninn dun, die Sahne, e paar Spritzer Sojasooß unn de Knowweloch dezu. Medd viel Curry werze unn noo Bedarf medd de Werzmischung, Salz unn evtl. Chilli schärfer mache. Wamma meh Flissichkeet maan, eenfach medd em Kochwasser vum Reis strecke. Grad solang dünschte, daß es Gemies noch scheen Biß hat.
De Reis im Sieb abschitte unn es Geschnetzelte uff eme Reisbett uffem Deller anrichte.
Nadierlich kamma aa anneres Gemies nemme, Laach,Gellerriewe odder aa Bambussprosse odder Soja-Mungobohnekeimlinge schmecke dodezu,wie es beliebt. Unn wamma Schweinegeschnetzeltes hat, geht das nadierlich aa.

De Kichebulle winscht e Gurrer!

Eierschnittlaachsalat met Kerschtcher

Fa de Salat fa 4 Portione:

10 Schtigg gekochte Eier, in Scheiwe odder Werfele geschnied, wie ma maan
1 Bund Schnittlaach, in Röllcher geschnied
1 Becher Schmandt
150 Millilidder Millich
1 Eßleffel Senneft, mittelscharf
4 -„- Essich (de guude Melfor is es Bescht)
1 -„- Zucker
Salz, Peffer, Paprigaapulver, Maggi

In de Salaatschissel se erscht die Salatsooß anriehre, dodezu de Schmandt met de Millich, em Senneft, Zucker unn de Schnittlaachröllcher verriehre, dann met Salz, Peffer, Paprigaapulver unn e paar Spritzer Maggi abschmegge, die geschniedne Eier dezu unn nochemol orndlich dorchriehre.
Es Eigääl leest sich do dann in de Sooß uff unn das gebbt nochemol meh Geschmack unn e scheen Farb.
Die Schissel kiehl stelle, bis die Broodgrumbiere fertich sinn.

Fa die Kerschtcher (Broodgrumbiere), aa fa so etwa 4 Leit:

1 gudd Kilo Grumbiere, feschtkochende wäre s bescht, vorwiechend feschtkochende gehn aa
1 Schtigg Zwiwwel, fein gewerfelt
1 Eßleffel Schweineschmalz, es geht aa met Öl zum Broode, met Schmalz schmackts halt
besser
Salz, Peffer
wamma maan, kamma aa gewerfelt Därrflääsch noch dezu duun
e gurrie Broodpann

Die Grumbiere schäle, in so etwa enner Saantimeder (1cm) Dorchmesser große Werfelcher schneide, unn gudd wäsche, in eme sauwere Kicheduuch drugge tuppe. Es bescht gehts in erer gußeisern Pann, awwer wamma kään hat, geht aa e beschicht. De Schmalz auslosse unn die abgetruggelte Grumbierwerfel enninn, salze, peffere, noo finnef Minudde es erscht mol wenne unn so weider vunn alle Seite scheen kräftich anbroode, bis die Werfelcher goldich braune Kerschtcher krien. Die Hitz dann erunner stelle,e Deggel uff die Pann unn weiter broode, bis se dorch sinn (so etwa zwansich Minudde). Deggel erunner, unn die geschnitt Zwiwwel dezu (unn aa es Därrflääsch,wamma maan),Deggel druff unn noch e bißje breedele losse,dann alles nochemol dorjenanner mache. Wann needich, nochemol met Salz unn Peffer noowürze.

De Kichebulle winscht e Gurrer!!!

Go Top