Lyonersalat medd feuriche Broodgrumbiere

eenfachie, leckerie, herzhaftie Hausmannskoscht (Fa so etwa 4-5 Persone)

Fa de Salat:

1 Ringel Lyoner, gudder aus de Metz, kenn Diskaunter-Pseudo-Lyoner
4 Schtigg Eier,gekocht,geschält unn in Scheiwe odder Werfele geschnied
5 Schtigg saure Gummere aus em Glas, in Werfele geschnied
1 Schtigg Zwiwwel, in halwe Ringe geschnied
1 Doos Erbse
1-2 Schtigg Paprigaaschoot, fein geschnied
5 Eßleffel Krääm fresch odder Sauerrahm odder Sahne
1 Teeleffel Senneft, mittelscharf
1 Eßleffel Zucker
1 Teeleffel Salz
8 Eßleffel Essich, am Beschte Melfor klassisch
2 Eßleffel Salat-Öl
1 Maul voll Kraanewasser, hundsgeweenliches
Peffer, Paprigaapulver, Maggi, frische Kräuter noo Geschmack

De Lyoner schäle unn in feine Streife odder Scheiwe schneide, wie’s beliebt. Die Zwiwwel, die Gummere, Erbse unn de Paprigaa dezu, in erer separat Schissel die Salatsooß zubereite,dodezu die Eier, Krääm fresch, Senneft, Zucker, Salz, Essich, Paprigaapulver, Peffer, e bißje Wasser unn e paar Spritzer Maggi gudd verriehre, dann erscht es Öl dezu. Wamma Kräuter maan, ab eninn, un gudd verriehre. Es Eigeel soll sich scheen ufflöse. Es Dressing medd de annere Zutaate gudd vemische unn de Salat 10 Minudde ziehe losse.

Lyonersalat medd feuriche Broodgrumbeere

Fa die Broodgrumbiere:

1 gudd Kilo Grumbiere, feschtkochende wäre s bescht, vorwiechend feschtkochende gehn aa
1 Schtigg Zwiwwel, fein gewerfelt
e gurrie Broodpann medd Deckel
Öl zum Broode, Salz unn Peffer, Chillipulver noo Bedarf

Die geschälte Grumbiere in Scheiwe odder Werfelcher schneide unn abtroppe losse odder besser e bißje in eme sauwere Gescherrduuch trucke riwwelle. Nedd se wennich Öl (de Panneboddem soll schunn ganz bedeckt sinn) in de Pann heißmache, Grumbiere eninn, Deckel druff unn finnef Minudde broode losse. Mem Pannewender umdrehe unn widder finnef Minudde unn so weider, bis se scheen knuschprich braun angebrood sinn. Ewentuell die Hitz e bißje erunner stelle. Gudd 20 Minudde im gesamte unner mehrmoolichem Wenne gare losse. Dann die Zwiwwel dezu unn nochemol finnef bis zeeh Minudde broode. Die ferdiche Broodgrumbiere salze unn peffere unn noo Geschmack mem Chillipulver feurich werze.

Noch e Tipp: Wamma die Grumbiere beim Esse in die Salatsooß eninndriggt, geht em es Herz uff unn widder zu.

De Kichebulle winscht e Gurrer!!!