Schweinelendche im Schinkemantel

Schweinelendche im Schinkemantel
Eenfach lecker

Dodezu brauche mir: (fa 3 – 4 Persone)

1 Schtigg Schweinelendche (sauwer vun Fettrand unn Silwerhäutche befreit)
8-12 Scheiwe Schwarzwälder Schinke
2 Becher Sahne
1 Becher Krääm fresch odder Schmandt
3 Essleffel Senneft, mittelscharf
200 Millilidder Weißwein
1 Schtigg Zwiwwel, gewerfelt
1 Schtigg Knowwelochzeebche, fein gehackt odder gedriggt
1 Essleffel Zucker
200 Millilidder Kraanewasser, hundsgeweenliches

Salz, Peffer, Gewerzmischung „Kräuter der Provence“, Soßebinder,
Öl zum Broode

IMG_20160214_121343

Unn so werd’s gemacht:

Es Lendche in 3 – 4 etwa 3 cm dicke Schtigger schräg durchschneide. Beidseitich leicht salze, stramm peffere unn ebbes vunn de Kräutermischung druff streue.
De Senneft medd ennem Becher Sahne scheen sämich verrühre. Die gewerzte Flääschscheibe scheen medd de Senneftsahne instreiche unn in Schickestreife zu eme Päckche innpacke. Ewentuell medd eme Zahnstocher fescht stecke. In de Pann die Päckcher im Öl scheen uff beide Seite anbroode. Noo etwa 5 Minudde erausnemme unn beiseit stelle. Die Zwiwwelle, de Zucker unn de Knowweloch in de Pann anschwitze, bis es leicht braun werd. Medd em Wein ablösche unn etwa 10 Minudde inkoche losse. Die üwweriche Senneftsahne, es Wasser unn de zwette Becher Sahne dezu unn verrühre. Die Flääschpäckcher serick in die Pann unn etwa nommo e verdel Stunn leicht köchele losse. Die Sooß medd Salz, Peffer, Krääm fresch unn de Gewerzmischung abschmecke unn bei Bedarf mim Soßebinder andicke.
Dodezu passe hervorragend Nudele odder Salzgrumbiere unn e schenner griener Salat.

De Kichebulle winscht e Gurrer !

IMG_20160214_150028

Werschingwickel medd Salzgrumbiere

Werschingwickel medd Salzgrumbiere

So muß das sinn, lecker Hausmannskoscht, wie bei Muttern!

Dodezu brauche mir: (fa etwa 10 bis 12 große Wickel)

IMG_20151115_122451

1,2 Kilo Hackflääsch, gemischt
1 Kopp Wersching
2 Schtigg Zwiwwelle, in Werfelcher
2 Zeebcher Knowweloch, gepreßt odder fein gehackt
3 Schtigg Eier
1 Tass Weckmehl
1 Eßleffel Senneft, mittelscharf
1 Becher Schmandt odder Krääm fresch
250 Millilidder Weißwein
3-4 Eßleffel Butter
1 Tass Mehl
Öl zum Broode, Salz, Peffer, Paprigaapulver, Muschkatnuss, Maggi
Zahnstocher odder Küchengarn

IMG_20151115_141514

unn so mache mir’s:

Die Werschingblätter, immer zwee-drei, in eme große Topp medd kochend Wasser zwee bis drei Minutte weech koche (blanchiere), daß se beim Wickele nedd breche, unn uff die Seit leje. Fa enner Wickel kamma zwee bis drei Blätter rechne. Das Kochwasser nedd fortschitte, das brauche mir noch. Fa die Füllung in eme Dippe es Hack medd de Eier, Weckmehl, Senneft, Salz, Peffer, Maggi, Paprigaa, de Knowweloch unn enner Hälft Zwiwwelwerfele gudd durchknete. Muschkatnuß drunner mache, awwer nedd zu viel. Dann die Blätter sortiere unn noo Größ uffdeele. Jeweils e Hand voll Füllung se erscht in e inneres helles Blatt unn dann nochemol e großes Außeblatt drumherum wickele unn medd Zahnstocher odder Küchegarn fixiere. In eme große Bräter die Wickel nooenanner im Öl scheen anbroode, bis die Blätter farb krien. Wann se all gebrood sinn, sesamme im Bräter medd em Wein ablösche. Dann medd em Blanchierwasser uff fülle unn circa e Stünnche schmore losse. Im Au behalle unn ewentuell noch Blanchierwasser noo fülle.
Fa die gudd Sooß duun mir in eme separate Topp die Butter schmelze, die anner Hälft vunn de Zwiwwelle glasich werre losse unn mim Mehl e Mehlschwitz mache, also vorsichtich es Mehl anröschte, ohne es anbrenne se losse. Medd eme gudde halwe Lidder Broodeflüssichkeet aus em Bräter, wo die Wickel drin sinn, ablösche unn inkoche losse. Medd Salz, Peffer, Butter unn em Schmandt abschmecke unn mim Pürierstab mixe. Die Wickel aus em Bräter nemme unn die Sooß zu de reschtlich Broodeflüssichkeet dezu, medd Soßebinner binne unn nochemol abschmecke. Die Wickel nommo fa e paar Minutte in de Sooß ziehe losse, fertich.

Dodezu basse am beschte Salzgrumbiere, weil ma die so scheen in die Sooß drigge kann.

De Kichebulle winscht e Gurrer!

IMG_20151115_145605

Bockbiergeschnetzeltes medd Farfalle

Bockbiergeschnetzeltes medd Farfalle

Deftich, kräftich, zackich – weil mer Bier nedd nur trinke kann

Dodezu brauche mir: (fa 4-5 Persone)

1 Kilo Schweinegeschnetzeltes
2 Schtigg Zwiwwelle, gewerfelt
2 Zeebcher Knowweloch, gepreßt odder fein gehackt
1 Eßleffel Senneft, mittelscharf
2 Eßleffel Tomaademark
100 Millilidder Sahne odder Krääm fresch
1 Flasch Bockbier, e halwer Lidder, ich hann es gudde Mönchshof genomm
1 Eßleffel Zucker
1 Eßleffel Gemiesebrieh, instant
1/2 Lidder Flääschbrieh, odder e Dippche Knorr Bouillon pur z.B.
Öl zum Broode, Salz, Peffer, Paprigaapulver, Sooßebinder

1 Pack Farfalle-Nudele, e halb Kilo

IMG_20151108_154636

unn so werd’s gemacht:

In erer hoch Pann es Flääsch im Öl anbroode, Zwiwwelle, Knobi unn de Zucker dezu, denoo es Tomaademark unn alles e bißje anröschte losse. Dann kommt es Bier eninn unn das ganze gudd inkoche losse. Die Flääschbrieh dezu unn nochemol e paar Minudde uffkoche. Medd em Senneft, de Gewerze unn de Sahne abschmecke.

Die Nudele noo Packungsanleitung zubereite.

Dodezu baßt nadierlich e griener Salat.

De Kichebulle winscht e Gurrer!

IMG_20151109_154109

Rindergulasch „Kircheneck“ medd gewalzte Bandnudele

Rindergulasch „Kircheneck“ medd gewalzte Bandnudele

medd e bißje viel meh Gemies drin, weil die Oma immer gesaad hott: „Mir misse spare, es Rindflääsch isch se deier!“

gulasch2
Dodezu brauche mir: (fa 4-5 Persone)

1 Kilo Rindergulasch, kleen geschnied, so 1 cm Werfelcher
2 Schtigg Zwiwwel, grob geschnied
2 Zeebcher Knowweloch, gehackt odder gepreßt
3 Schtigg Paprigaaschote, gebutzt unn geschnied
250 Gramm Suppegemies, (Gellerrieb, Sellerie, Laach), in Werfelcher
1 Doos Pizzatomaade, alternativ drei Tomaade in Werfele geschnied
300 Millilidder Rotwein, kää so schlechter
3/4 Lidder Flääschbrieh, Instant, Würfel odder Bouillon pur Rind vunn Knorr
1 Eßleffel Zucker
3 Scheiwe Schmelzkääs
Oliweöl zum Broode, Salz, Peffer, Paprigaapulver, Maggi, Tomatemark hundsgeweenliches Kraanewasser zum nooschitte

1 Pack gescheite Bandnudele (nedd immer die aus em unnerschte Regal nemme)

gulasch1
Unn so werd das was:

Die Flääschwerfel mim Zucker im Öl anbroode. Wann es Flääsch Wasser loßt, so lang bruddelle losse, bis die Brieh ziemlich vedampft is. Die Zwiwwel unn de Knowweloch dezu, e gudder Eßleffel Tomatemark dezu unn unner Riehre bißje röschte losse. Kräftich medd em Salz, Peffer unn Paprigaapulver werze. De Rotwein eninn, riehre unn gudd inkoche losse. Die Flääschbrieh dezu, umriehre unn gudd zwee bis drei Stunn bei reduzierter Hitz schmore. Zwischedrin als emol e Maul voll Kraanewasser noo schitte. Zum Schluß de Schmelzkääs eninnriehre, medd de Gewerze unn e paar Spritzer Maggi nommo deftich abschmecke.

Die Bandnudele noo Packungsanleitung zubereite.

E guddie Boll Gulasch uffem Deller Nudele serwiere, nedd se knapp, mir wolle jo satt wirre.

E Tipp:
Wie jeed Gulasch schmeckt das am nägschte Daa nochemol so gudd! 😉

De Kichebulle winscht e Gurrer!

Hähnchebruschtfilets medd Basmatireis an Curry-Mango-Sooß

Hähnchebruschtfilets medd Basmatireis an Curry-Mango-Sooß

currymango2

simpel unn herrlich exotisch

Dodezu brauche mir: (fa 5 Persone)

5 Schtigg Hähnchebruschtfilets
3 Tasse Basmatireis
2 Eßleffel Butter
1 Eßleffel Zucker
1 Schtigg Zwiwwel, fein gewerfelt
1 Zeebche Knowweloch, fein gehackt odder dorchgedriggt
2 Eßleffel Curry Pulver, am Beschte aus em gudde Gewerzlaade odder aus em Türkemarkt in Humborch z.B.
100 Millilidder Weißwein
1/2 Lidder Hinkelsbrieh, Instant odder Bouillon pur vunn Knorr
1 Schtigg mittelgroßer Abbel, geschält, in Werfelcher geschnied
1/2 Schtigg Mango, geschält, in Werfelcher geschnied
50 Millilidder Orangesaft, frisch
300 Millilidder Sahne odder e Becher Schmandt
1 Schtigg Paprigaaschoot, rot, gewerfelt
1 Schtigg Paprigaaschoot, grien, gewerfelt
Soßebinder, Salz, Peffer, Oliveöl

Unn so werd’s gemach:

Die Butter im Topp schmelze, die Zwiwwel unn de Knobi medd em Zucker anschwitze. Die Mango unn de Abbel eninnriehre, kurz andünschte, de Curry unn de O-saft dezu unn gudd mische. De Wein eninn schitte unn uffkoche losse. Medd de Hinkelsbrieh ufffülle unn alles gudd weech koche losse. Dann mim Pürierstab fein mixe. Die Sahne dezu, korz uffkoche unn medd Salz, Peffer unn eventuell noch e bißje Curry noo würze. Noo Bedarf medd Sooßebinner andicke.

De Reis noo Packungsanleitung koche.

Beim Anrichte medd de in Werfelcher geschnied Paprigaaschoot garniere.

De Kichebulle winscht Eich e Gurrer!

 

currymango1