Bäikonn Bomb (Bacon Bomb) vum Grill

medd Gellerriewe-Mais-Salat
(e amerigaanischer Hackbroode in knuschpricher Speckhüll)

dodezu brauche mir: (fa vier Persone)

1 Kilo Hackflääsch, gemischt
2 Schtigg Eier
100 Gramm Weckmehl
3-4 Pack Bacon in Scheiwe, geht aa Friehschtiggsspeck, am Beschte is, wamma de geraacht Schweinebauch beim Metzjer in e bissje dickere Scheiwe schneide losst
200 Gramm geriewener Kääs
2 Schtigg Zwiwwel, gewerfelt
1 Eßleffel Senneft, mittelscharf
1 Eßleffel Honich
5 Eßleffel Barbecue-Sooß, ich nemm es liebscht die Classic vunn HP
Salz, Peffer, Maggi, Paprigaapulver, Chiliflocke
Grillschale, Alufolie, evtl. Backpapier
vorher uff youtube gugge, wie es Speckgitter gemach werd!

So geht’s weiter:

Es erscht stelle mir die Füllung her, dodezu mische mir es Hack medd de Zwiwwel, de Eier, em Weckmehl, Senneft, e Teeleffel Salz, e Pries Peffer, Paprigaa unn e paar Spritzer Maggi in erer groß Schissel unn knete alles scheen dorch.
Dann stelle mir es Speckgitter wie uffem Bild her. Am Beschte vorher uff Youtube „bacon bomb speckgitter“ inngewwe unn sich angugge, wie das geht, de „Blackforrest barbecue“ zum Beispiel zeit das ganz gudd. Ich mache das uff eme große nasse Holzbrett, ma kanns aa uff Backpapier mache. Das Gitter werd dann met 2-3 Eßleffel vunn de Barbecuesooß ingepinselt, die Hackflääschmischung dann wie uff de Bilder druff verdeele, in die Mitt de Kääs streue unn noch die iwweriche Baconscheiwe leje. Das ganze dann wie e Deppich sesammerolle. Druff achte, daß es nedd uffreißt. Scheen medd de Hänn zu eme „Laib“ forme unn medd de Noot no unne uff die Grillschaal leje, wie uffem Bild. Zum Schluß die reschtlich Barbecuesooß mim Honig, Chiliflocke unn e bißje Wasser vermische unn de „Laib“ scheen innpinsele. Ab medd dem Ding uff de Grill unn bei etwa 160 Grad een bis eenehalb Schtunn grille. Geht nadierlich aa im Backowe. Wamma noch Marinaad iwwerich hat, kamma nadierlich nochemol noopinsele. Wann die Zeit erum unn de Speck außerum scheen knuschprich is, uff em Schneidbrett in Scheiwe schneide unn serwiere.

Fa de Gelleriewe-Mais-Salat brauche mir:

1 Kilo Gelleriewe, gebutzt unn geraschpelt, grob odder fein, noo Beliewe
1 Doos Maiskerner
1 Zeebche Knowweloch
4 Eßleffel Melfor Essich
1 Teeleffel sießer Senneft
1 Teeleffel mittelscharfer Senneft
1 Teeleffel Zucker
5 Eßleffel Kraanewasser, hundsgeweenliches
Rapsöl o.ä., Salz, Peffer, Paprigaapulver, Maggi, evtl. Kräuter

Alle Zutaade metnanner vermische, mem Salz, Peffer, e paar Spritzer Maggi unn evtl. Salatkräuter abschmecke. De Salat e halb Stunn ziehe losse. Vor’m Serwiere nochemol dorchenanner mache.

Uffem Deller e Scheib Broode met em Salat anrichte. Dodezu frische Bagett odder Flitt serwiere.
De Kichebulle winscht e Gurrer!

Go Top