Spaghetti „noo Art der Köhlersfraa“, vunn de Idaliener aa „alla Carbonara“ genannt

(geht ganz fix unn schmackt himmlisch)

fa 3-4 Persone

mir brauche dodezu:

1 Pund Spaghetti
5 Schtigg Eigääl (Eigelb), es Eiweiß kenne ner Eich in die Hoor schmiere 🙂
200 Gramm Därrflääsch, Speck odder Schinke, wer maan aach Kochschinke, in Werfelcher
200 Millilidder Sahne
100 Gramm geriewener Parmesan
1 Eßleffel Oliweöl
1 Zeebche Knowweloch, fein gehackt odder gepreßt
Salz, Peffer

Die Spaghetti uffstelle unn noo Packungsanleitung weech koche. Derweil in eme Töppche die Schinkewerfel im Öl anbroode. In eme Schisselche die Eigääl, Sahne unn de Parmesankääs verriehre, gudd salze unn peffere. Die ausgelossne Schinkewerfelcher dezu. Wann die Spaghetti gudd sinn, Herdplatt aus, abseihe, serick in de noch warme Kochtopp schitte unn es Gemenge aus de Schissel driwwer unn uff de ausgeschalt, awwer noch warm Herdplatt, scheen dorchmische, bis es Ei anfangt se stocke. Ewentuell nochmo noowerze.
Ferdich is der Spass!
Dodezu e fein Saläädche – perfekt!!!

De Kichebulle winscht e Gurrer!

Dippelabbes wie vunn de Oma

fa 3-4 Persone

2-3 Pund gurre Grumbiere
1 Stang Laach, gebutzt unn in Streifcher geschnied
1-2 Schtigg Zwiwwel, in Werfelcher geschnied
1/2 Pund Därrflääsch, in Werfelcher
2 Schtigg Eier
2-3 Eßleffel Butter odder Butterschmalz zum Broode
1 Bund Peterling
Salz, Peffer, geriewener Muschkaat, e gurrie Pann

Die geschälte Grumbiere fein reiwe, das geht am Leichteschde nadierlich medd nerer Kichemaschin. Wamma kään hat, is halt Muschkelkraft aangesaat. Die Masse duud ma dann in eme sauwere Kicheduuch gudd ausdrigge, daß der Grumbiersaft erauskommt, bis e recht feschtie Masse entsteht. Das ganze in erer Schissel medd de Zwiwwel,de een Hälft vunn em Därrflääsch,em Laach,de Eier,em Peterling gudd vermenge unn met de Gewärze abschmecke. De Schmalz odder die Butter in de Pann schmelze, die anner Hälft vum Därrflääsch drin auslosse, dann die Masse aus de Schissel eninn unn gudd vermenge. Jetzt muß ma e bißje debei bleiwe, immer e Zeit broode losse, bis e scheen braunie Grumbierkorscht ensteht, dann wenne, widder korschtich broode losse, wenne, usw. Noo gudd zwansich Minudde etwa die Hitz erunner stelle unn de Deckel uff die Pann. Ab unn zu noogugge unn nochemol wenne, nedd daß es schwarz werd!
Noch e gudd halb Stunn weider gare losse.
Ma kann de Dippelabbes aa in ner gefett Ufflaafform,medd Deckel, etwa ennie Stunn bei 160-180° im Backowe mache, gebbt dann halt kenn so Korscht, die letscht verdel Stunn die Form dann uffdecke, daß es owwedruff knuschprich werd. Bei uns dehemm isser halt aus de Pann komm.
Im Saarland eßt ma dodezu Abbelbrei, awwer Dippelabbes schmackt aa gudd met eme griene Salat.

De Kichebulle winscht e Gurrer!

Lyoner-Nudel-Pann

(e Esse, fa wanns mol dabber schnell gehn muß)

fa 4 Persone

die Zutaate:

1 Pund Nudele
1 Ringel Lyoner, gudder aus de Metz, kenner aus em Diskaunter
2 Schtigg Eier
1 Schtigg Zwiwwel, mittelgroß, in Werfelcher geschnied
1 Beidel geriewener Kääs (sinn mehrschtens 200 Gramm in so eme Beidel)
3 Eßleffel gurrie Butter
Salz, Peffer, Paprigaapulver, Maggi

Die Nudele in Salzwasser weech koche, derweil de Lyoner schäle unn in scheene Streife schneide. Wann die Nudele gar sinn, abschitte unn beiseit stelle. In erer gudd Pann die Butter schmelze unn de Lyoner gudd aanbroode, daß es scheene braune Schtigger gebbt. Die Zwiwwel dezu, unn glasich anlosse. Das ganze aus de Pann eraus in e Schissel duun unn warm halle. Die abgetroppne Nudele in die noch heiß Pann, ewentuell e bißje Butter noo duun, unn gudd aanröschte losse, scheen gleichmäßich umschichte unn dorchenanner mache, daß aa genuuch goldbraun angebroodne Nudelcher debei sinn. Derweil die Eier in eme Schisselche, medd ner Gawwel, met de Gewerze gudd verkleppere. Wann die Nudele scheen korschtich sinn, de Lyoner dezu duun unn die geklepperte Eier driwwer. Dorchenanner mache,de Kääs driwwer straue unn weiter mische bis es Ei scheen gestockt hat. Ewentuell noch noowürze.
Dodezu baßt am Beschde e Salat.

De Kichebulle winscht e Gurrer!

Paniertes Kammkotlett medd Grumbierstambes unn Kohlerääbcher in heller Sooß

(fa 4 Persone):

fa de Stambes:

1 gudd Kilo Grumbiere, mehlichkochend, geschält, gebutzt unn geschnied
150 Millilidder Sahne
200 Millilidder Millich
3 Eßleffel gurrie Butter
Salz, Peffer, Muschkaatnuß (gerieb)

Die Grumbiereschnitz in eme Topp gudd 20 Minudde koche, daß se scheen weech sinn, es Wasser aus em Topp abschitte, die Millich met de Sahne, de Butter ninn schitte unn mim Grumbierstamper gudd dorchstambe. Met gudd Salz, e bißje Peffer unn Muschkaat abschmecke. Eventuell met meh Butter kreemicher mache.

fa die Kohlerääbcher in heller Sooß:

3 Schtigg scheene Kohlerääbcher, sauwer geschält unn in Streife geschnied
1 Schtigg kleenie Zwiwwel, in Werfelcher
3 Eßleffel Margarine
2 Eßleffel Mehl
1/4 Lidder Millich
1 Eßleffel Gemiesebrieh (Pulver aus em Glas)
3 Eßleffel Peterling, fein gehackt
Salz, Peffer, Muschkaatnuß (gerieb)

Die Kohlerääbcher etwa e Verdel Stunn weech koche, abschitte, awwer dodebei e Verdel Lidder vum Kochwasser ufffange unn beiseit stelle, die Kollerääbcher warm stelle. Im Topp die Margarin schmelze unn es Zwiwwelche anschwitze, ohne braun werre se losse, die zwee Eßleffel Mehl dezu streue unn ganz korz gudd riehre, das derf nedd braun werre, dann medd de uffgefang Brieh ablösche, es Gemiesebriehpulver unn die Millich eninn riehre. E bißje uffkoche losse. De Peterling eninn unn mim Pürierstab orndlich dorchmixe. Wamma maan, kamma noch e bißje Sahne dezu duun odder zwee Scheibcher Schmelzkääs.
Mim Salz, Peffer unn e bißje vum Muschkaat gudd abschmecke. Die Kollerääbcherstifte in die Sooß duun unn warm halle.

Fa die Kotletts:

4 Schtigg scheene Kammkotlett, kenn so dinne derre Dinger aus em Diskaunter
2 Schtigg Eier, durchenanner gequirlt, uff eme Deller
1 Deller Mehl
1 Deller Weckmehl
Salz, Peffer, Schmalz odder Butter odder Öl zum Broode

Die Kotlett met Kichekrepp trucke tuppe, vunn beide Seite salze unn peffere, dann noenanner erscht im Deller mim Mehl wenne, dann ins Ei, zum Schluß ins Weckmehl, e bißje andrigge unn ab in die gudd heiß Pann (mim Öl odder Fett nadierlich). Vunn beide Seide so drei-vier Minudde broode, bis die Panaad scheen goldbraun is. Je noo Greeß der Pann entwedder enns noom anner odder meh broode. Am Schluß all angebroodne Kotletts in die Pann, e Schluck Kraanewasser in die Pann, de Deckel druff unn bei reduzierter Hitz noch so 10 Minudde gudd dorch ziehe losse.

De Kichebulle winscht e Gurrer!

Grumbier-Laach-Ufflaaf met Hackflääsch

(so fa etwa vier bis finnef Leit, je noodem, ob Esser odder Fresser)

die Zutaate:

1 Pund Hackflääsch, gemischtes (fa Zugeraste unn Leit jingeren Alters, e Pund sinn finnefhunnert Gramm)
1,2 Kilo Grumbiere, feschtkochende odder vorwiechend feschtkochende
2 Stange Laach, gebutzt unn in Streife/Röllcher geschnied
200 Gramm geriewener Kääs
1 Becher Schmandt
1 Becher Sahne
200 Millilidder (hundsgeweenliches) Kraanewasser
1 Eßleffel Zucker
1 Eßleffel Gemiesebrieh-Pulver (Flääschbrieh geht aa)
1/2 Eßleffel Paprigaapulver
1/2 Teeleffel Muschkaatnuß, gemahlnie
Salz, Peffer, Maggi, Oliweöl

unn so werd’s gemach:

Die Grumbiere koche (zwansich Minudde sollte lange), abschitte unn abkiehle losse (ihr wolle eich jo nedd die Flosse vebrenne), schäle unn in Scheiwe schneide.
Es Hack medd em Zucker unn e bißje vum Öl in eme Topp anbroode. Es Brieh-Pulver mim Wasser dezu gewwe, uffkoche losse unn de Laach eninn duun unn finnef Minudde gare losse. Die Hitz erunner stelle, Sahne, Schmandt, Muschkaat, Paprika, Salz unn Peffer eninn, e paar Spritzer Maggi, gudd erumriehre unn gudd werzich abschmacke.
E Ufflaafform met em Öl ausreiwe, dann medd enner Laache Grumbierscheiwe ausleje, e Schicht vun dere Gemies-Hack-Sooß aus em Topp iwwer die Grumbiere vedeele, dann widder dodruff e Schicht Grumbierscheiwe, unn so weider mache, bis seletscht, als owwerschtes, e Laache Gemies-Hacck-Sooß driwwerkommt. De geriewene Kääs driwwer straue unn bei 160° (Umluft) im vorgeheizte Backowe e dreiverdel Stunn backe.

De Kichebulle winscht e Gurrer!!!

Eierschnittlaachsalat met Kerschtcher

Fa de Salat fa 4 Portione:

10 Schtigg gekochte Eier, in Scheiwe odder Werfele geschnied, wie ma maan
1 Bund Schnittlaach, in Röllcher geschnied
1 Becher Schmandt
150 Millilidder Millich
1 Eßleffel Senneft, mittelscharf
4 -„- Essich (de guude Melfor is es Bescht)
1 -„- Zucker
Salz, Peffer, Paprigaapulver, Maggi

In de Salaatschissel se erscht die Salatsooß anriehre, dodezu de Schmandt met de Millich, em Senneft, Zucker unn de Schnittlaachröllcher verriehre, dann met Salz, Peffer, Paprigaapulver unn e paar Spritzer Maggi abschmegge, die geschniedne Eier dezu unn nochemol orndlich dorchriehre.
Es Eigääl leest sich do dann in de Sooß uff unn das gebbt nochemol meh Geschmack unn e scheen Farb.
Die Schissel kiehl stelle, bis die Broodgrumbiere fertich sinn.

Fa die Kerschtcher (Broodgrumbiere), aa fa so etwa 4 Leit:

1 gudd Kilo Grumbiere, feschtkochende wäre s bescht, vorwiechend feschtkochende gehn aa
1 Schtigg Zwiwwel, fein gewerfelt
1 Eßleffel Schweineschmalz, es geht aa met Öl zum Broode, met Schmalz schmackts halt
besser
Salz, Peffer
wamma maan, kamma aa gewerfelt Därrflääsch noch dezu duun
e gurrie Broodpann

Die Grumbiere schäle, in so etwa enner Saantimeder (1cm) Dorchmesser große Werfelcher schneide, unn gudd wäsche, in eme sauwere Kicheduuch drugge tuppe. Es bescht gehts in erer gußeisern Pann, awwer wamma kään hat, geht aa e beschicht. De Schmalz auslosse unn die abgetruggelte Grumbierwerfel enninn, salze, peffere, noo finnef Minudde es erscht mol wenne unn so weider vunn alle Seite scheen kräftich anbroode, bis die Werfelcher goldich braune Kerschtcher krien. Die Hitz dann erunner stelle,e Deggel uff die Pann unn weiter broode, bis se dorch sinn (so etwa zwansich Minudde). Deggel erunner, unn die geschnitt Zwiwwel dezu (unn aa es Därrflääsch,wamma maan),Deggel druff unn noch e bißje breedele losse,dann alles nochemol dorjenanner mache. Wann needich, nochemol met Salz unn Peffer noowürze.

De Kichebulle winscht e Gurrer!!!

Go Top