Kürbissupp met mediterranem Tatsch (fa etwa 3-4 Persone)

die Zutate:

1 Schtigg Hokkaidokürbis (so etwa 800 g) in Werfele geschnied
2 Schtigg Paprikaschoote geel odder rot, kleen geschnied
3 Schtigg Tomate in Werfelcher geschnied odder halt e Doos Pizzatomate
1 Schtigg Zwiwwel, mittelgroß, gewerfelt
2 Schtigg Knowwelochzeewe, gehackt odder gepreßt
1 Bescher Cräm fresch
750 Millilidder Brieh (Flääschbrieh vum e Werfelche odder Knorr Bouillon pur Rind)
1 Eßleffel Zucker
3 Eßleffel Oliweöl
1 Eßleffel Cörriepulver (Curry)
Salz, Peffer, Kräuter, z.B.Rossmarin, Basillikum, Oregano, Thymian (gebbts aa als Mischung Kräuter der Prowenze) unn geriewener Parmesankääs

wer maan, kann beim Anrichte im Deller uff die Supp druff noch e paar Scheibcher geschniedne schwarze Olive, Chillischoot odder aa gebroodne Garnele odder Krabbe druffduun, kwasi als Zugaab, sieht gudd aus unn schmackt

Die Zwiwwelwerfelcher unn die Knowwelochzeebcher met em Zucker im Oliveöl anschwitze, Kürbis, Paprika, Tomate unn Kräuter dezu unn in de Flääschbrieh zirka 20 Minudde wääch koche, met eme Pürierstab gudd dorchmixe. Dann die Cräm fresch eninnriehre unn met Cörrie, Salz, Peffer abschmecke unn noch finnef Minudde bei kleener Hitz weider ziehe losse. (E Tipp: wer’s noch e bißje kremicher maan, noch een Eckelche odder zwee Scheibcher Schmelzkääs eninnriehre)
Im Deller dann e Pries geriewener Pamesan driwwer straue unn noo Beliewe met ennem odder all vunn dene owwe genannte Zugaawe anrichte.

Dodezu basst am Beschde frisch Bagett odder Tschabadda (Ciabatta).

De Kichebulle winscht gurrer Abbedidd!

Semmelknepp unn Pilzrahmsooß

Semmelknepp

Die Zutate fa vier Persone (so in etwa)
6 Schtick Weck (alde, kenne aa schunn trugge sinn, egal, ob weiße odder Rogge o.ä.)
3 Eßleffel gehackter Peterling (kamma aa TK. nemme, muss kä frischer sinn)
10 Gramm gurrie Butter

1 Schtick Zwiwwel, fein gehackt
250 Millilidder Millich (je truckener die Weck, evtl. aa e bißje meh)
3 Schtick Eier
Salz, Peffer

Erscht emol die Weck in dinne Scheibcher odder in Werfelle in e großie Schissel eninn schneide,
die gehackt Zwiwwel in de Butter e bißje anschwitze unn de Peterling aa, die Millich etwa lauwarm mache, nedd koche losse. Dann die Millich iwwer die Werfele schitte, die Zwiwwel unn de Peterling dezu unn ziehe losse. Derweil die Eier met em Salz unn Peffer vequirle unn dann alles sesamme scheen fescht zu eme daatschiche Dääg vemische. Wie owwe beschrieb, eventuell noch Millich dezu duun.
Sollt der Dääg se nass sin, kamma sich met Weckmehl nochmo helfe. Dann met de Griffelle etwa tennisballgroße Knepp forme unn in siedendem,awwer nedd sprudelnd kochendem Wasser so zwanzich Minudde ziehe losse, se derfe nur nedd koche,sunscht falle se ausenanner.
Noch e Tipp: Wamma will, kamma aa Speckwerfelcher met de Zwiwwele anbroode, dann hat ma Speckknepp.

Pilz-Rahmsooß

300 Gramm Pilze (Stäänpilze wäre grad gudd im Herbscht)
1 Schtick Zwiwwel, fein gehackt
1/8 Lidder Weißwein (derf aa Pälzer sinn)
1/8 Lidder Broodesaft (Fong (Fonds)) (wamma kenner hat, kamma aa „Bouillon pur“ vunn Knorr nemme,weil, in der Not nemme mir aa Knorr)
200 Millilidder Sahne
3 Eßleffel Oliweöl
2 Eßleffel gurrie Butter
Salz, Peffer, Zucker, Kräuter, geriewener Parmesankääs

Die Pilze wäsche unn schneide, in eme Topp die Zwiwwel mim Oliweöl unn eme gestrichene Eßleffel Zucker anschwitze, bis alles so leicht braun werd. Die Pilze eninn unn nochemol e bißje anschwitze.
De Wein dezu, innkoche losse, wann die Pilze gar sinn, absiewe, beiseit stelle unn de Pilzfong met em Broodesaft nochmo innkoche losse. Sahne dezu unn met Salz, Peffer unn Butter abschmecke. Etwa enn bis zwee gehäufter Eßleffel vunn de gegarte Pilze widder in die Sooß mache,die Kräuter unn de geriewene Parmesan dezu unn mim Pürierstab orndlich dorchmixe. Die reschtliche Pilze dezu unn nochemol gudd wärme.
Noch e Tipp: Die Sooß basst nadierlich nedd nur zu Semmelknepp….

Go Top